Amboras de la Tierra de Miranda

El mirandés : situación sociolingüistica...

2010-02-15T18:16:00.003Z

El mirandés: situación sociolingüistica de una lengua minoritaria en la zona fronteriza portugueso-española ye l título de l lhibro de Aurelia Merlan que será apresentado no dia 18 deste més de febreiro, an Oubiedo (Spanha).

Trata-se d'ua obra que resulta d'un trabalho de campo an que fúrun arrecolhidas anformaçones an todas las lhocalidades de lhéngua mirandesa, habendo sido "antrebistada" arrimada a 10% de la populaçon. Mas nun ye solo essa la funte d'anformaçon: houbo tamien grabaçones (arrimado a 30 horas), para alhá de muitas funtes scritas.

Ye, sien dúbeda, de l studo mais prefundo i atualizado algua beç feito subre l "stado atual" de la lhéngua mirandesa. Sien precunceitos, merece que ls mirandeses (i todos aqueilhes que s'anteréssen pul feturo de las lhénguas) míren para este trabalho cun la proua d'ua lhéngua que ls nuossos "pais" traírun até nós i cun la respunsabilidade que tenemos an la deixar als nuossos filhos.

L'Ouropa de ls 27 i las sues lhénguas

2009-12-01T14:38:00.002Z

Bai a tener lhugar an Paris, n'Ounibersidade de Paris 7, de 3 a 5 de Dezembre, un "Colóquio" subre l'Ouropa de ls 27 i las sues lhénguas.

Quien querga saber mais subre esto puode ber eiqui: http://www.univ-paris-diderot.fr/pageActu.php?num=1951

I tamien se bai a falar un cachico de la lhéngua mirandesa. Quien querga ber l Programa stá eiqui - http://www.eila.univ-paris-diderot.fr/recherche/conf/ciel/e27l/fr/programme - i quien puoda aparecer por alhá será, por cierto, bien-benido(a).

El princepicu

2009-11-19T09:52:00.002Z

Acabo que recebiran "llionés", la traduçon de L princepezico. La nuossa lhéngua "armana", de l outro lhado de la frunteira política, ten assi esta obra que qualquiera mirandés puode porfeitamente ler, neilha ancuntrando, stou cierto, alguas de las cousas que mos armánan i, porque nó, alguas outras que fázen cun que seiamos outros.

Tamien li nun jornal que staba pronta la traduçon para mirandés, feira por Ana Afonso, cun la mano de mais alguns mirandeses i nó solo. Parabienes a todos i acá aguardamos, an forma de lhibro, la obra final.

L princepezico ye ua de las obras mais traduzidas nas lhénguas ditas "minoritárias", "minorizadas", "regionales", etc. A mi nun me spanta. Tratando-se d'ua obra donde stá bien clara la defréncia antre l mundo de ls grandes i de ls pequeinhos, ou melhor, la forma cumo uns i outros beien l mesmo mundo, parece-me "natural" que las lhénguas ditas "pequeinhas" quérgan neste speilho lhiterairo amostrar la sue bison d'un mundo que ye siempre l mesmo mas bisto cun outros uolhos.

I nun seriemos nós muito mais probres que nun fússen ls uolhos de l princepezico a mostrar-mos cumo son las cousas?

Manifiesto

2009-10-02T16:22:00.001+01:00

Hai arrimado a un anho que tubo lhubar an Oubiedo (Astúrias, Spanha) un ancontro donde se falou subre l passado, mas subretodo an ne feturo de las lhénguas i de las culturas nacidas de l antigo reino ástur.
Ende se falou de muita cousa mas dende saliu este manifiesto - qu'eiqui deixo -i que nun ye mais do qu'ua declaraçon d'antençones de lmuito que se puode benir a fazer a partir dessa stória quemun.
Las lhénguas sírben (debien serbir) para ounir i nó para debedir. Nesta altura d'acesas çcussones subre l feturo de la Tierra de Miranda, Dius querga que ls nuosso políticos seian capazes de mirar para este manifisto i ber nel ua "ginela d'ouportunidades" pa la nuossa tierra.

La beleza de las lhénguas

2009-09-28T22:16:00.001+01:00

Peguei hoije outra beç no Dictionnaire amoureux des langues de Claude Hagège, que saliu inda astanho. (Re)leio l’antrada subre la beleza de las lhénguas. I nun puodo star mais d’acordo cun l outor. Todas las lhénguas son guapas, mas todos nós gustamos mais desta ou daqueilha, indas que nun sábamos porquei. Mas tamien ye buona la tentatiba que l outor fai para splicar esse gusto ou solo l gusto. I las lhénguas alhá cuntínan, agarradicas als sous mundos i muitas deilhas a la spera qu’algun ou algua le querga amprestar la sue boç.

Lhéngua i política

2009-09-13T14:35:00.003+01:00

Stá a chegar l tiempo de las eileiçones. Por estas alturas siempre aparécen uns i outros a defender la lhéngua mirandesa. A prometer mondos i fondos. Ye buono qu'aparéçan. Ye buono que se lhémbren de l mirandés indas que seia solo estas alturas. Mas ye pena que l mirandés - cumo todas las outras lhénguas - se deixe ambulber nestas guerras. L mirandés nun ye deste nien daquel, ye de quien s'anteressa por el i subretodo ye de quien l fala. Se ls eileitos de Miranda ténen mais fama do qu'outros dében-lo, an grande parte, a la lhéngua mirandesa, a la cultura i al património que la giente de la Tierra de Miranda fui capaç de criar i de traer até nós. Por isso, nun ye la lhéngua que precisa de ls políticos, son ls políticos que precísan de la lhéngua. Até stou an dezir qu´hai qu'apartar las lhénguas de la política i de ls políticos (tal cumo, an cierto sentido, hai que las apartar de ls lhenguistas!).

Seia cumo fur, la lhéngua i la cultura de la Tierra de Miranda merécen muito mais do que solo se lhémbren deilha de tiempos a tiempos. Precisa muito mais de que solo alguns se lhémbren deilha. I nun precisa nada de serbir cumo bandeira (solo) d'alguns porqu'eilha ye de todos i quier que todos steian cun eilha.

Las lhénguas de l'Ouropa

2009-04-11T19:35:00.003+01:00

Para quien puoda anteressar eiqui queda este anteressante sítio Web cun buonas andicações subre l assunto.

http://portal-lem.com/fr/index.html

Niebe

2009-01-13T22:31:00.002Z

Niebe

La niebe abraça la tierra
Beilan farras
Giladas.

Son almas
Que se lhebántan
De l cielo
Eiterna morada.

I Dius
Pastor bien-amado
Assóma-se para ber
L sou álgido ganado
Nun baia el fugir
De l sou celestre cerrado.

Purmeiro
Queda abismado
Mirando i a cismar
(Por ber tanta alma beilando?)
Apuis manda l sol abrir
I cumo que por ancanto
Fai la niebe derretir
I las almas regressar.

Niebe i friu

2009-01-09T18:01:00.002Z

Ye ua nuite de Eimbierno.
L cielo de un azul alto i strelhado cubre la preinada. L algodon an rama ampeçou lhougo pula manhana i todo l santo die fui bê-lo caer. Parecie sembrado a manadas. Nun era l purmeiro nebon de l anho mas era de certeza l mais fuorte. Cun l aire calhado, l lhençol branco stendiu-se debagarico i a sue buntade por toda la preinada. Las einormes farrapas íban pousando até nun quedar un palmo çtapado de tierra. L silêncio gilado de ls grandes nebones deixaba oubir l mais pequeinho bruído. Mas nada se oubie. La tierra parecie drumida. Ancantada por aquel ancanto.
– L nebon lhimpa la tierra, home! cumo dízen ls mais bielhos.
I alhá staba eilha, acunchegada al friu, calhada, cumo se stubisse spurgando todos ls males de las sues antranhas.
Apenas la nuite ampeçou a caer i lhougo la cisca de la sierra se lhebantou. Traie la cara gilada i sopraba cumo an sue casa. Capaç de tolher la nariç al mais pimpon! Las candeias de l cielo, assopradas por un airico de buona madrina, ardien inda cun mais coraije. Relhuzien tanto que solo podie ser para se acalcéren tamien eilhas, pensou Catalina, que acababa de se lhebantar por trás de l Cabeço de la Boldreira."

António Bárbolo Alves, Cuntas de la Tierra de las Faias

La bida de ls blogues

2009-01-08T22:16:00.004Z

Hai muito tiempo qu'eiqui nun benie. Tanto tiempo qu'até se m'habie çquecido la direçon de l blogue! Mas tamien ye esta la bida de l blogues, deixan-se star assi queticos i apuis, un die, acá spéran por nós i nós tornamos a besitá-los i, quien sabe, a dar-les algua bida.
Desta beç, talbeç tenga sido l friu que se fai sentir alhá fuora i fai estes dies mais ancalamunhados do que nunca que dou ganas d'eiqui tornar. Ou haberan sido estes retratos - http://www.flickr.com/photos/33537308@N05/ - que me dórun essas ganas de benir eiqui acalcer un cachico mais la tierra que tanto precisa de nós.
Seia cumo fur ye siempre tiempo d'agradecer a la tierra i tamien a quien ye capaç de fazer estas obras d'arte.

Oubir mirandés

2008-09-05T20:20:00.002+01:00

Para quien querga oubir mirandés puode agora fazé-lo neste podcast dedicado a la lhéngua mirandesa:

http://mirandes.mypodcast.com/index.html

La pátria

2008-04-21T22:15:00.003+01:00

La lhéngua ye la mie Pátria

I you nun tengo Pátria: tengo mátria

You quiero frátria.
Caetano Veloso

Hubo un tiempo an que la Tierra de Miranda era un spácio çconhecido pa la maiorie de ls pertueses. Longe de Lisboua, sien stradas ou outros meios d’acá chegar, ls mirandeses fazírun-se pertueses por obra i grácia de ls acausos de la Stória i daqueilhes que fúrun defenindo las frunteiras. De cierto que se sentírun mirandeses antes de se sentir pertueses. Mas esta cundiçon tamien nunca la negórun, subretodo quando, por efeito de las guerras i outras lhuitas, fúrun chamados a defender la Pátria. Muita sangre fui dada i arramada an sou nome que, para muitos, fui mais madrasta qu’outra cousa.
Mas quei ye la Pátria? La berdadeira ye la tierra de ls nuossos pais, cun quien tenemos lhaços stóricos, afetibos i, modernamente, tamien jurídicos. La Pátria de ls mirandeses stá eiqui. Para alhá de todos ls jacobinismos i de todos ls jacobinos que solo beien la capital i l restro a partir de la capital. Se queremos un paiç donde todos mos síntamos filhos de la mesma mai i de l mesmo pai, hai que pensar an repartir l mal i l bien de maneira d’eigual . I isso quier dezir tener an cunta la giente, mas tamien la tierra, pois sien eilha nun hai giente.
Ls nuosso pais, ls nuosso abós, deixórun-mos esta tierra d’hardança i ye nuossa oubrigaçon tratar deilha, para que nun se torne nun çcampado onde nada medre. Para que seia un spácio houmanizado, natural, mas cun giente, capaç de fazer arregalar ls uolhos a quien chega i dá de frente cun la subérbia natural de las arribas ou cun la serenidade firme i anfenita de l praino.
Para isso, ye preciso que la Pátria seia tamien Frátria. Que nun tenga filhos i antenados, mas solo filhos. Que deia als qu’eiqui bíben ls meios d’acá cuntináren a bibir. D’eiqui criáren ls sous filhos. D’eiqui ancuntrar amprego. Cundiçones de bida. Ou anton iremos todos pa la borda de l mar i quando acá benirmos talbeç ancuntremos peinhas, árboles, bichos, mas nun ancuntrará cerrados, nien binhas, nien huortas, nien trigos, nien centenos, nien giente, mas ua tierra de naide, donde las ninas de ls uolhos yá nun se zlhúmbraran a nun ser cun las lhágrimas de nun habermos sido capazes de guardar l’hardança que mos deixórun.

P.S. Este testo staba perdido i ten la data de Maio de 2007. Que me lhembre nuca fui publicado. Mas se yá fui, eiqui queda outra beç.

Wikipédia i lhéngua mirandesa

2008-04-15T23:10:00.004+01:00

Nun sei quien ye l outor de l artigo (antrada) subre la lhéngua mirandesa - http://pt.wikipedia.org/wiki/LÃngua_mirandesa - que, díga-se ten alguas cousas acertadas. Mas essa d'ampeçar por dezir que l mirandés ye un dialeto de l sturiano ye que bate mui cierto. Buono, yá se sabe, nien todo l qu'anda na rede ye peixe. Ou, por outras palabras, hai que (saber) çcunfiar de las anformaçones que mos éntran an casa atrabeç de l computador.

Miranda Tierra de Cinema

2008-04-05T00:13:00.004+01:00

Lhémbro-me d'eiqui hai uns anhos, nua de las Semanas de Cinema Lusófono qu'ourganizei an Fráncia, an cumbersa cun l realizador Fernando Lopes, d'habermos falado subre la Tierra de Miranda. Essa tierra, dezie-me el, ye ua tierra chena de memórias cinematográficas. Muitos realizadores pertueses i strangeiros filmórun alhá filmes anteiros ou cenas de filmes. I falemos de Manuel de Oliveira i de l sou Acto de Primavera, de Margarida Cordeiro, de l filme Silvestre, de l Doutor Jivago, de la Sombra de ls Abutres i d'alguns filmes i realizadores mais qu'agora nun me lembra.

Siempre quedei cun l'eideia de benir a fazer na Tierra de Miranda qualquier cousa subre essas memórias cinematográficas mas tamien cun buntade d'amostrar, cun l'arte i la magie que solo l cinema l sabe fazer, esta tierra. Anquanto isso nun bai para lantre, eiqui queda un abraço bien fuorte pa ls mius amigos niçois que ténen lhebado aqueilha Semana de Cinema Lusófono por tierras de l sul de Fráncia para lantre. Alhá mos ancuntraremos por essa altura.

Cuntas de la Tierra de Miranda

2008-03-25T11:53:00.002Z

Inda cun alguas cousas para melhorar mas yá se puoden oubir las purmeiras cuntas an mirandés. Eiqui queda l sítio: http://www.memoriamedia.net/

Aprobeito para deixar l miu agradecimiento a todos aqueilhes que mos quejírun amprestar la sue boç, la sue eimaige i la sue sabedorie para que puodíssemos deixarmos eiqui un cachico desse manantial que ye la nuossa lhiteratura oural. Spero que puodamos cuntinar a çcubri-la i a dar-le l balor qu'eilha merece.

La lhéngua mirandesa: ancruzelhadas i caminos de l último seclo

2008-03-18T22:51:00.007Z

Saliu n'amprecípio deste anho, cun eidiçon de José Ramon Morala i la publicaçon de l Instituto de la Lengua Castellano y Leonés , l testo d'ua comunicaçon que you fiç l anho passado nun Cungresso subre ls 100 de la publicaçon de la obra de Menéndez Pidal El dialecto leonés.

L testo saliu cun alguns erros (alguns que you yá bi i, se calhar, muitos outros que nun bi), por isso, mas tamien porque la obra ye defícil d'ancuntrar an Pertual, eiqui queda l testo para quien puoda anteressar.

http://abarbolo.no.sapo.pt/Artigo_Pidal.pdf

ALVES, António Bárbolo (2008), "La lhéngua mirandesa: ancruzelhadas i caminos de l último seclo", José R. Morala Rodríguez (ed.), Ramón Menéndez y El dialecto leonés (1906-2006), Instituto de la Lengua Castellano y Leonés, Colección Beltenebros, pp. 295-323.

Que lhénguas para manhana?

2008-03-17T15:13:00.004Z

Bale la pena ler l dossiê de l jornal Le monde subre l feturo de las lhénguas. La lhéngua pertuesa, indas que seia la 3ª lhéngua de l'Ouropa i la 6ª de todo l mundo la mais falada an ne mundo, cun mais de 200 milhones de falantes ye quaije çquecida. Chegou-me a la caixa de l correio ua carta de l'Ambaixada de Pertual an Paris a reclamar cun l jornal. I fázen mui bien. Hai que reclamar contra l amperialistas i hai que çcunfiar de las lhénguas dominantes. Mas tamien hai que preguntar porquei muitos de ls nuossos gobernantes, an funçones de Stado, quando chégan a palanques anternacionales, úsan outra lhéngua que nó l pertués para ls sous çcursos?! Ténen bergonha de falar pertués? Quieren mostrar que tamien sáben outras lhénguas? Nun sáben qual ye l balor nien qual ye spácio de l pertués no mundo?

I no meio desta eiraçada de la mundializaçon que spácio queda para ua lhéngua cumo l mirandés?

Nun me parece que seia (solo) cun cartas nien bozes de reclamaçon que podemos demarcar l balor de la nuossa lhéngua. La lhéngua mirandesa ten que ganhar las sues raízes, l sou campo, l sou spácio, mas nun puode ser contra las outras lhénguas. Há-de ser por eilha, cun aquilho que bale i cun aquilho que ten. Ye esse l nuosso zafio i la nuossa lhuita. S'assi nun fur, tal cumo la lhéngua pertuesa nun merece mais do qu'ua linha no dossié de l Le Monde, l mirandés nun merecierá mais do que l nome na rialidade birtual, mas sien las raízes, la fundura i la spessura que la tierra dá als homes i a las cousas.

Dicionário de Espanhol-Português

2008-02-25T22:21:00.007Z

Nun ten muito a ber cun l mirandés mas, apuis de tantos anhos a trabalhar nel, bien merece que deixe eiqui un retrato i salude tamien l nuobo Dicionário de Espanhol-Português, de que sou un de ls outores. Por cierto, eiqui ancuntraran, al menos, alguas antradas donde l se fala de l mirandés cumo la lhéngua de la Tierra de Miranda. I, quien sabe, tamien d'eiqui podran sacar alguas eideias (ou oupeniones!) de cumo se debe fazer un dicionário bilhingue.

Lhéngua Mirandesa na Cidade de Miranda

2008-02-22T15:51:00.003Z

Ls mius parabienes a l'Associaçon de Jubentude Mirandesa por estas cousas todas que fai. Assi se trabalha i assi se fai oubir l son de la nuossa lhéngua.

Elogio de l "dialeto" mirandés

2008-02-13T23:51:00.003Z

Nas comemoraçones de ls 400 anhos de la cidade de Miranda, die 10 de Julho de 1945, Bazílio Rodrigues, pintor, natural de Bila Seco, dixo un çcurso chamado Elogio do Dialecto Mirandês. L testo fui trascrebido no jornal Primeiro de Janeiro de 18 de Julho de 1945. Eiqui queda un cachico desse çcurso (corregido segundo l'ourtografie moderna) i tamien l retrato de l jornal donde stá publicado.
La lhéngua particular
Que l cunceilho sabe falar
Este antigo palabreado
De benerados abós ardado,
Tan particular sien eigual
Que nun hai outro an Pertual,
Deberá ser respeitado,
Portegido, acarinado,
Guardado cun abareza,
(...)
Miranda, pobre Miranda
Que tanto tenes sido roubada!
De ls tous balores sburgada,
Nien al menos este scapou:
Até l dialecto se te l roubou!
Poboaçones que fúrun tues,
Antre outras ua i mais dues,
Firmes, mai querida, quedórun
I l tou dialeto nunca deixórun,
Neste recanto pertués
Fálan siempre mirandés!

Las mies purmeiras palabras an mirandés (2)

2008-02-08T09:30:00.000Z

Çqueci-me onte de dezir que ls zeinhos de l lhibro son todos de Enrique Carballeira Melendi, a quien queremos deixar ls nuosso agradecimiento.

Ye tamien l'altura de dezir qu'esta obra ten l'ajuda de la Câmama de Miranda, de l'EDP i de l'Academia de la Llingua Asturiana. A todos l nuosso oubrigado.

Aprobeito agora para respunder, publicamente, a ua pergunta que me deixou l miu amigo Reis Quarteu: porquei screbi (no post d'onte) libro i nó lhibro ou cumo se debe screbir esta palabra?

Antes de mais cumben dezir que la forma que stá nas Purmeiras palabras... ye lhibro. Ora, cumo se sabe, las palabras latinas ampeçadas por L- ténen, rigra giral, an mirandés, l son LH- (puode la splicaçon nun ser mui científica mas acho que todos l'antendemos i tamien nun perde, por isso, ningua de la cientificidade). Lhibro ye ua deilhas (<lat. libru). Assi i todo, sabemos que la passaige de L- para LH- fui algo qu'acunteciu durante muito tiempo i que, als poucos, fui zaparecendo.

Tenemos, por isso, palabras mais "nuobas" (no sentido que chegórun hai menos tiempo a la lhéngua) i que se dízen cun L-: loureiro, lebe, lábio, ler ... Outras hai que nalguns lhugares ou alguas pessonas dízen cun L- outras cun LH-: lato / lhato, lápeç/ lhápeç, ladeínha / lhadeínha ...

Mas l que ye tamien anteressante de ber ye que alguas palabras que sabemos que son "nuobas", cumo electricidade, i que chegórun atrabeç de l pertués, son ditas cun LH- no ampercípio: lhetrecidade. Ou seia, un fenómeno que se julgaba muorto hai muitos seclos (Leite de Vasconcelos diç qu'el yá zapareciu no seclo VIII cun la chegada de ls mouros) se calhar inda stá bibo hoije an die. Porquei? Porque la lhéngua ye biba i quien la fala conhece las sues regras que bai aplicando mesmo que nun tenga cuncéncia disso.

Libro ou lhibro? Licença ou lhicença? Letra ou lhetra? Limon ou lhimon? ... Por aquilho que yá dixe, anclino-me a pensar que, sendo l LH- ua marca de l mirandés, debemos aplicá-lo i multiplicá-lo mesmo als neologismos. Mas todo isso debe ser feito debagar, cun algua parcimónia, deixando que la lhéngua, l tiempo i ls falantes, fágan l restro de l trabalho.

Lembro-me, a este propósito, (you sei qu'hai quien diga i scriba "lhembro-me") que quando eiditemos la obra Lhiteratura Oural Mirandesa (an 1999) a muita giente pareciu stranho que screbíssemos "Lhiteratura". La palabra nun eijistie an mirandés, dezien i, por isso, habiemos de dezir i screbir "Literatura". D'algua forma tenien rezon i, cunfesso, até a mie que la sculhie, me parecie, nun purmeiro momento, un cachico stranha. Mas acho qu'hoije an die, i nun passórun assi tantos anhos, yá a naide le parece ralo que se fale an lhiteratura mirandesa.

P.S. Nun entro eiqui an cunta l que se passa cun l dialeto sendinés donde, cumo se sabe sien que se saba mui bien porquei, nun hai LH- einicial. Mas essas son cuntas doutro rosairo.

Las mies purmeiras palabras an mirandés

2008-02-07T15:24:00.000Z

Las mies purmeiras palabras an mirandés ye l título d'un librico, an forma de Bocabulairo Eilustrado, que será apresentado no próssimo die 21 de Febreiro (Die Anternacional de la Lhéngua Materna). La obra ten cerca de sietecientas palabras, arrimadas por temas cumo la Família, l Cuorpo, la casa, la Tierra, la Scola, la Mitologie i alguas más. L'eidiçon ye de l Centro de Studos António Maria Mourinho, sendo la parte de la lhéngua de la mie respunsabilidade i de Duarte Martins.

Eiqui queda para yá este pequeinho anúncio, sperando nós que la obra benga a serbir nó solo para quien ampeça cun las purmeiras palabras mas tamien a todos ls que, sabendo muitas outras, quieren daprender cumo se scríben las purmeiras, çcubrindo tamien un cachico mais de l mundo que se sconde detrás de cada ua deilhas.

L spácio de l mirandés

2008-01-30T18:15:00.000Z

Ua de las questones subre la lhéngua mirandesa que bai quedando sien respuosta ye la de sabermos qual ye, berdadeiramente, l lhugar qu'eilha debe acupar. Ou seia, se partimos de l prancípio qu'eilha ten de cum(bibir), no die a die, cun las outras lhénguas cumo l pertués, l spanholo i até outras lhénguas anternacionales, que campo queda reserbado pa l mirandés? La pregunta (i las respuotas) talbeç sírban tamien para outras lhénguas que bíben nun stado parecido. De qualquier maneira stou cierto qu'essa ye mais ua de las çcussones sérias qu'hai que tener antes que las cousas ánden por eilhas. I andar por eilhas quier dezir que ls fuortes acabaran siempre por s'amponer subre ls outros. Mas la glotofagie nun me parece ser einebitable se furmos capazes d'ancuntrar campos donde cada lhéngua tenga l dreito d'acupar l purmeira fila. Campos eiguales para todos? Spácios cerrados donde outras lhénguas nun puodan antrar? Nó, las eiras donde medrórun las lhénguas que mos fazírun son mui grandes, son de todos i de todas. Mas ye preciso que cada un(a) saba donde queda l sou eirado i qu'este tenga las puortas i ginelas bien abiertas pal eirado de l bezino.

La mie bida por un pê

2008-01-20T10:43:00.000Z

Stá outra beç na moda la çcusson subre l chamado Acordo Ourtográfico de la Lhéngua Pertuesa. Onte a la nuite oubie, nua telebison, ua Sra Professora de pertués apresentar las sues rezones contra l Acordo, dezindo que nunca na sue bida screberie ótimo (sien pê, claro). Acababa apuis por dezir qu'inda tenie soidades de quando se screbie pharmácia, etc.

La queston de l Acordo bai muito alhá destas cunsoantes. Mas l que ye anteressante ber ye cumo la giente s'agarra a estas pequeinhas cousas de la scrita, parecendo a las bezes que quaije capaç de dar la sue bida por ua cunsoante, por ua bogal, por un assento ou qualquier outro sinal diacrítico.

Nun antendo porquei nun s'agárran tamien a las palabras i las deixan "morrer", çquecéndo-las. Por eisemplo, eiqui bai para uns anhos un carro qu'antraba n'ua strada donde staba un sinal redondo, bormeilho, cun un traço branco, hourizontal, an ne meio, dezie-se qu'antraba an sentido proibido. Hoije a die entra an contramão. I donde bieno isto? De l Brasil. Eiqui hai uns tiempos atrás quando s'iba a la bola, por eisemplo, cumprába-se un bilhete. Hoije cómpra-se un ingresso. I donde bieno la palabra. De l Brasil. Ye cierto que muitas palabras fúrun purmeiro de Pertual pa l Brasil i agora tórnan, fruito de ls tiempos. Las lhénguas múdan porque stan bibas i nun quérgamos nós parar no tiempo aquilho que ye feito de mudança.

Buono, isto tamien habie de serbir para falar de la lhéngua mirandesa. Tamien eiqui studo i stá an çcusson l problema de la scrita. Hai muito para fazer i nun beio, anfeliçmente, maneira de qu'isso se faga mui debrebe. Tamien nun beio muito anteresse an que se scriba sien l respeito pu las matrizes morfológicas de la lhéngua. Por eisemplo: se se diç you conheço, tu conheces, etc. nun fai sentido que se diga que l berbo se scribe coincer. I muitos, muitos mais eisemplos.

Assi i todo beio cun melhores uolhos aqueilhes que scríben (alguas palabras, claro) diferentes de mi, do qu'aqueilhes que, nun screbindo, solo ándan a cata destas diferenças para dezir que l'ourtografie (d'alguas palabras) ye ua maneira de s'afirmar contra outros. I este ye l ponto mais amportante. Las eidentidades - pessoales, nacionales, lhenguísticas ... - que s'afírman contra ls outros i nó por eilhas, son eidentidades anfermas. L'ourtografie d'ua lhéngua debe tener princípios i reglas. Mas estas dében ser ls mais lhargas i ounibersales possibles, pois quanto mais diferenças fúren capazes d'abarcar mais porfeitas seran.

E-learning an mirandés

2008-01-18T14:56:00.000Z

Segundo se lei na página web de la Escola de Negócios e Administração - http://www.ena.pt/ - stá purparado un curso de e-learning an mirandés.

Por anquanto parece qu'inda stan solo a la spera d'anteressados no curso. Assi i todo eiqui quédan dezde yá ls mius parabienes para quien decidiu apostar tamien na lhéngua mirandesa. I speramos qu'haba muita, muita giente anteressada an daprendé-la.

Rue de la Lhéngua Mirandesa

2008-01-08T22:59:00.000Z

Nun la conheço, nunca alhá stube nien sei mesmo s'eijiste. Mas eiqui queda l sítio, cun código postal i todo, para quien querga (i puoda) alhá ir.

http://codigopostal.ciberforma.pt/codigo_postal.asp?dis=11&con=05&fre=06&art=605140511&loc=12167

Die de Reis

2008-01-06T18:29:00.000Z

Hoije ye Die de Reis i, por isso, eiqui queda ua de las cantigas de reis cantadas na Tierra de Miranda.

Os Reis do Ouriente

Os Reis do ouriente
Trés reis que ban a adorar
A Jasus onipotente
Com debução sengular
Com debução sengular

Em busca do Rei Heirodes
Pa los ir encaminhar
Pa los ir encaminhar
Heirodes cumo malbado
Cumo un perberso malino
Cumo un perberso malino
Às abessas le ansinaba
Os santos reis o caminho
Os santos reis o caminho

Los trés reis cumo éran santos
Seu caminho ían seguindo
Seu caminho ían seguindo
Guiados por uma strela
Até chegar ao menino
Até chegar ao menino

À entrada de Belém
A estrela se parou
A estrela se parou
Lá por trás duma cabana
Deus Menino se assomou
Deus Menino se assomou

A cabana era piquena
Não cabiam todos trés
Não cabiam todos trés
Adorabam a Jasus
Cada um por por sua beç
Cada um por por sua beç

Uns le oufereciam ouro
Outros ancenso i mirra
Outros ancenso i mirra
A mirra cumo metal
I o ouro como alegrie
I o ouro como alegrie
Ancenso para ancensiar
Aquela glória debina
Aquela glória debina

Natal nas Tierras de Miranda

2007-12-22T22:24:00.000Z

Nun hai dúbeda, ye por estas alturas de l Natal que la Tierra de Miranda mais mostras dá de la sue riqueza cultural i eidentitária. Hoije, an muitas de ls lhugares, yá ls cembones de lheinha stan purparados para séren acendidos na nuite ded 24. Ye un grito contra l friu, ua boç caliente quese lhebanta a zafiar l Eimbierno i a cumbidar l sol pra qu'el nun s'apague!

An alguns lhugares essas foguerias solo ampecaran a arder apuis de l Natal, ou mesmo no Anho Nuobo. Mas todas cun l mesmo zafio i la mesma mensaige: son hinos al sol, a la bida, al renacimiento.

Outros hinos, benidos de l fondo de ls tiempos, son las muitas figuras i carochos que por estas alturas sálen a las rues. L Carocho de Costantin (no retrato eiqui al lhado), no die 27, la Bielha de Bila Chana, no die 1 i, nom mesmo die, l Farandulo de Tó i l Chocalheiro de Bumposta (para solo falar d'alguns). Cun eilhes carrégan l'ardança d'eras antigas, de ls tiempos an que la mai-natureza ciclicamente giraba un mundo nuobo. Las sues figuras, antigamente sagradas i hoije inda respeitadas anterprétan na tierra, cada ua a la sue maneira, essa cosmogonie criadora i debina. Assi i todo, indas qu'habendo pardido muito de l sentido oureginal, neilhas palpita, nun spácio memorial, muitas daqueilhas que son las nuossas raízes eidentitárias. Ou seia, aquilho que somo i la maneira cumo mos dezimos.

Bale la pena benir de fuora para ber alguas destas manifestaçones. Mas bale muito mais la pena que la giente destas tierras beia neilhas cumo ua cousas que fai parte de la sue sangre, daquilho que fai que téngan ua eijesténcia muito mais spessa por ls alheçaces son mui fondos i firmes.

Lhénguas an peligro (L relatório de l'UNESCO)

2007-12-19T10:24:00.000Z

Eiqui yá uns tiempos, quando fui apresentada, an Miranda, un cahico d'un studo subre l stado de l mirandés, oubo muito bruído al redor desse trabalho. Alguns aprobeitórun para se rir. Anton agora que l mirandés ye ansinado nas scolas? Agora que ten ua lei que l reconhece? Agora qu'hai mais giente do que nunca a screbir an mirandés ye que bai acabar? Outros aprobeitórun para deixar alguns anátemas, ponendo-se de l lhado de quien acha que l mirandés nunca stubo de tan buona salude. Neste campo eilhes son ls paladinos dessa cundiçon i ls outros, aqueilhes que míran pa la lhéngua cun outros uolhos (nun sei se melhores se piores mas por cierto menos cumbencidos desse stado) , ls profetas de la zgrácia que solo bozeian mas pouco fázen.

Spero que l bruído atame. Nessa altura talbeç seiamos capazes de ber mais claro.

Para quien nun l conheça (ou l querga ler outra beç), eiqui queda un RELATÓRIO de l'UNESCO subre las Lhénguas an Peligro, alguas maneiras de "medir" l sou grau de salude ou, se quejirmos, d'anfermidade i tamien outras anformaçones subre las lhénguas de l mundo. Bale la pena saber mais un cachico!

http://portal.unesco.org/culture/es/ev.php-URL_ID=9105&URL_DO=DO_TOPIC&URL_SECTION=201.html

Nomes de rues an Miranda

2007-12-17T17:35:00.000Z

Deixei onte un retrato de Picuote cun las purmeiras placas toponímicas an mirandés. Se la memória nun m'anganha isso fui no Berano de 1997. Hai dieç anhos! Dieç anhos apuis fui an Miranda, na parte bielha de la cidade, que se punírun tamien ls nomes de las rues an mirandés. Pouca giente se ten dado cunta de l'amportança, indas que simbólica, deste feito pa la lhéngua mirandesa. Ye berdade que nun fui feito muito bruído al redor disso. I se calhar merecie (i inda merece) que se fazisse un cachico mais. Cumo se puode ber pul retrato d'ua de las rues, neste causo nun fui l nome que fui puosto an mirandés. Acrecentórun-se tamien alguns dados stóricos seia subre l chamadeiro propriamente dito, seia subre l antigo nome (quando tal fui çcubierto). Podemos assi deixarmos guiar por estas anformaçones çcubrindo un cachico mais de la cidade.

La lhéngua ye que, assi i todo, inda parece un cachico ambergonhada. Por isso, hai que fazer algua cousa para splicar a la giente qu'ende mora l'amportança de l nome de cada rue i para cada un puoda dezir (i screbir) "donde mora", respundendo i ponendo isso an mirandés.

Sinales de ls blogues (i de bida)

2007-12-16T23:07:00.000Z

Ye berdade! Nun sei porquei mas habie-me çquecido deste blogue que you criei. Sinales de ls tiempos! Si. Sinales de ls tiempos de ls blogues. Al poder de querermos fazer muita cousa ou de querermos saber todo l que se passa an todo l lhado - n'ua spécie de miedo de nun saber; l hourror de nun ber las notícias de l die; de nun ler l jornal ... - acabamos por mos çquecer de las cousas que stan mais acerca de nós.

Quando ampecei (!) cun esta paigana tenie l'eideia qu'el serbisse para eiqui poner alguas notícias desta tierra, resenbando outro blogue para outros assuntos que nun fússen notícias. L timepo passou sien que you disse mais notícias de la Tierra. Ora bien, a ber s'agora sou capaç d'amanhar mais tiempo para fazer cun qu'isso acunteça. Mas tamien nun bale la pena prometer porque nun gusto de prometer i nun cumprir.

Nua altura an que mos purparamos para poner uas nuobas placas toponímias an Picuote (mais guapas do qu'estas, indas qu'estas tamien seia bien guapas, i para que nun quéden dúbidas, dambas fúrun zenhadas pul mesmo outor), queda eiqui un retrato daqueilhas que fúrun las purmeiras placas toponímicas puostas na Tierra de Miranda.

Sítios, blogues i outros sinales de l tiempo

2007-05-27T22:06:00.000+01:00

Fui n’ua página de Picuote –www.bragancanet.pt/picote – que por estas tierras s’ampeçou a screbir an mirandés. Bieno apuis l mirandes.no.sapo.pt i muitas outras cumo ls blogues, alguns que nacírun antes outros apuis, mas nun ye isso que ben eiqui al causo. Se bien me lembro, cumo dirie Nemésio, eiqui bai para uns tiempos éran mui ralas las mensaiges sien nome nien rostro ou las oufensas coubardes. Son dues cousas bien diferentes que nun quiero eiqui misturar. Estas últimas, qu’anfeliçmente siempre oubo i que quaije siempre son tamien de giente (?) çconhecida, nun dében merecer mais cunsideraçones nien mais pena a nun ser aqueilha que tenemos pu las pessonas ourdinárias, coubardes ou cun grabes perturbaçones mentales.
Ye subre las mensaiges anónimas mas nó oufensibas qu’eiqui falo porque, por aquilho que bou lendo i bendo, son muitas i cada beç mais. Claro que quien derige ls sítios puode pura i simplesmente apagá-las ou nien sequiera las deixar publicar se nun stubíren eidentificadas. Mas isso nun bai a sanar l berdadeiro mal que ye, an miu antender, mais fondo do que las palabras sien rostro. Atrás deilhas scónde-se un alheçace social fondo i doliente que bai reçumando i crecendo. Ye la nubrina de l miedo, de l rancor, de la raiba que bai nacendo i medrando drento de l(s) silêncio(s), no miolho daquilho que nun se diç mas que s’habie d’haber dito. Puode ser qu’isto seia tamien mais un reçumadeiro ou un sinal de l stado pouco saudable de la nuossa democracie. La berdade ye que las praças públicas mirandesas, ls terreiros, ls “sagrados” ─ i eiqui saludo l fórun de Sendin, cun este nome, imbora tamien me pareça que nun ten serbido para çcussones mui sérias i por alhá ándan tamien estes bichos sien rostro ─, ls soalheiros, ls ajuntamientos, las tabernas i cafés ban quedando sien giente i neilhes medra l silêncio que, nua tierra d’ouralidade, de giente de palabra, mos bai tirando la boç i deixando mudos. La berdade ye qu’inda nun fumos capazes d’ancuntrar outros meios, outros spácios, outros fóruns, outros lhugares para ocupar esse spácio deixado uoco. Al mesmo tiempo que tenemos hoije an manos este poderoso meio de comunicaçon, cumo ye l’anternet, nun hai nien normas éticas pa la sue outelizaçon i cada beç la giente bibe mais arrinconada no sou buraco, cun ginelas birtuales abiertas pa l mundo rial.
Ye notório qu’hai un miedo generalizado i spargido. Serei you a quedar sien amprego? Se digo isto daquel será que l outro bai a gustar? Nun ganharei mais an star calhado? Ye melhor star calhado ou nun dar la cara.
Nua altura an que todos lhuitamos i defendemos la cuntinuaçon de l’Ounibersidade an Miranda, quando pedimos mais zambulbimiento, quando queremos mais democracie, serie buono que defendiessemos tamien la pluralidade d’oupeniones, qu’houbisse çcussones sanas subre aquilho que somos i para donde queremos ir, que mos abrissemos a las críticas, que salissemos de ls capulhos tribales i anteresseiros donde andamos metidos. Solo assi la Tierra de Miranda será capaç de renacer, salindo de l buraco donde mos quieren anterrar sien que, muitas bezes, mos deiamos cunta disso.
I, cumo dezie un miu bezino, Dius querga que steia anganhado!